Shillong, Nailar 15: Ka jingïaid lynti jong ka seng Khooid Yaka Wah Myntdu ka ladep ban dap san snem ha ka jingshakri ka ban peit na ka bynta ban ïada mei mariang bad kawei na ka jingïaleh kaba hakhmat jong kane ka kynhun kadei ban ïada ïa ka wah Myntdu kaba ki la leit tied jingkhang haduh ha ïingkashari jong ka National Green Tribunal (NGT).
Ka jingleit ujor sha ka ïingkashari NGT kadei ha u snem 2024 bad ka jingbishar halor kane mat kala iaid shakhmat bad ka jingbishar ba khatduh kan long ha ka 22 tarik u Nailar, 2025.
Hashuwa ba kin ioh ban sngap ïa ka rai kaba khatduh na ka ïingbishar NGT na ka bynta ka wah Myntdu ha New Delhi, kane ka seng ha ka taïew kaba ladep ha ka 9 tarik Nailar, 2025, ka la shong jingïalang ïamir jingmut ha ka Hall Chiliangraij, Jowai.
Ha katei ka sngi, katba ki dang ap ban ïoh ïa ka rai khatduh na ka NGT, kane ka seng ka la ïoh mynsiem na ka jingwan shim bynta jong ki waheh shnong bad riew pawkhmat bapher bapher, ki nongialam Seiñraij Jowai, ki paidbah nongshong shnong kynthei bad shynrang kila sam iaki symboh pyrkhat bad ai ruh ka jingkyrshan ba pura halor ka thong ban iakhun dawa pynneh pynsah bad ban ïada ïaka wah Myntdu.
Ha katei ka jingïalang, ka la don ka sur ban kyrpad iaka NGT Principal bench ba kan pynlong ïa ka JHADC kum ka party namarba kadei ka nongpeit nongsumar bala pynkupbor daka Khyrnit kaba Hynriew (Sixth Schedule) bad ruh ba kan lah ban shna ïa ki aiñ ki kyndon ba ïadei bad ka wah Myntdu bad kiwei ki wah ba don hapoh u pud ka District Council.
Ha ka jingïakren bad u President ka seng Khooid Yaka Wah Myntdu u Bah Khroo Lamsalanki Pariat u la pyntip ba haka jingiaid lynti ba 5 snem kaba ki ladep ban buh jingkyrpad iaka sorkar Jylla kumjuh ki bor district ban ai jingiada iaka wah Myntdu, hynrei ka jubab kaba ki ïoh ka long pynban da ka surok bala pyntrei harud ka wah.
Shuh shuh u Bah Pariat u la ong, ba kum ka seng ka pdiang ïa ka surok tangba ban ktah pat iaki um ki wah da kaba bret pathar iaki khyndew ki maw shapoh wah kadei ka bym lah ban pdiang.
