VO: San sngi hadien ka jingioh pdiang ia ka jingsumar ha Nazareth Hospital kata naduh ka 16 tarik u Naiwieng, 2024, kaba katei ka hospital ka la pdiang na ka jingkwah ki bahaiing kiba la bud ia ka jingbthah jong ki doctor ka Bhoirymbong Community Health Centra (CHC) ba dei ban rah noh sha ki hospital heh ia ka khyllung kaba don ar snem phra bnai, watla ka la don ka jingpyrshang ban ai ia ka jingsumar ba bha tam hynrei ka jingpang ka la jop khlem ka jingioh ia ka jingkoit.
Ha ka 21 tarik Naiwieng, 2024, tang shi sngi hadien ba U Shillong Mail u la lah ban pynmih ia ka khubor kaba na ka liang ki bahaiing ki la pynsngew ia kiba bun ki jingkynnoh pyrshah ia ka Bhoirymbong CHC, kane ka khynnah kaba dei na ka shnong Lumsohpieng, Ri Bhoi Distrik ka la khlad noh ha ka por 3:30 nohphai sngi.
Ïa kane ka khynnah la pynkit sha Nazareth hadien ba ki doctor ka CHC Bhoirymbong ki shem ba ka jingpang ka khyllung ka la ban jur ha ka jingshitom ka ba la long lethargic kata ban duna ban ring mynsiem bad kane ka dei kaba la batai na ka case history lyngba ka Doctor in charge katei ka CHC, ka Dr. B Sangma.
Ha ka jingbuddien kata haduh shuwa ba kane ka khyllung kan khlad noh, la ïoh jingtip ba ki doctor ka Nazareth ki la pyrshang ban ïaleh katba lah ban pynïoh ïa ka jingkoit jingkhiah tangba na ka jingban jur ki jingshitom kiba ka tyllong khubor na ki doctor ka iathuh ba ki bynta ki ba sha poh ha ka met kane ka khyllung kim lah shuh ban kyrda bad ba bun ki la duh namar ka jingjop ki khniang jingpang kaba ka don ka jingong, ba ka jingpang ka dei kaba ju iatip kum ka Sepsis.
Watla ka Dr. B Sangma ka Doctor incharge ka CHC ka ladep ban pynshai hynrei na ka liang ki bahaiing kane ka khyllung kaba dei ka meiduh kane ka khyllung ruh ka la ban biang ban ong bad kynnoh ba ka jingbakla hi kadei na ka CHC.
