Shillong: Ha ka jingiadei bad ka khubor halor ka Kong Wompher Suting, ka longkmie kaba shah thang ha la u kurim jong ka, ha shnong Niriang, West Jaiñtia Hills District, ka la pynlong ia ka National Commission for Women ha ryngkat ka Meghalaya State Commission for Women ba kin leit jngoh ia ka ha ka 20 tarik u Naiwieng, 2024.
Kane ka longkmie kaba shah thang ha la u kurim ka dei ka ba don hapdeng 35 bad 40 snem ka rta bad ruh ka don hynriew 6 ngut ki khun bad haduh mynta ka dang don ha ka jing shah sumar ha Shillong Civil Hospital bad kane ka dei ha ka sien kaba ar.
Ha ka jingleit jngoh ki commission, ïa ka National Commission for Women la mihkhmat da ka Member, ka Kong Delina Khongdup, bad ka Kong Ïamon M Syiem, ka Chairperson ïa ka Meghalaya State Commission for Women.
Kum ban shu kdew ba kane kam la paw pyrthei ha ka 19 tarik u Naiwieng, 2024, shi sngi hadien ba ka Kong Bhalang Suting, hynmen jong kane ka longkmie ka la ujor da ka ejahar pyrshah ia u kurim ka Kong Wompher, u Bah Dahun Dkhar ha Ummulong Police Beat House kata hadien ka jingsaphriang ki dur kiba pyni ia ka briew ryngkat ki dien shah thang da ka ding kiba i shyrkhei haduh katta katta.
Hadien ka jingwan jngoh ia katei ka longkmie, ki dkhot na ka Women’s Commission ki pynlong ka jingtohkit na ki bor pynïaid ka Civil Hospital bad kumjuh na u Doctor uba sumar ia katei ka longkmie.
Haba kren sha ki lad pathai khubor, ki bor pynïaid ka Civil Hospital Shillong kiba kynthup ia u Dr C. Wanniang, u Surgeon bad ka Dr A.Kharjana, Additional Director of Health Servcices kiba la ong ba ia katei ka longkmie la wanrah nyngkong ia ka ha ka 07 tarik u Risaw, 2024 bad ki la pyntip sha ka Police Booth katei ka jaka sumar.
U Dr C Wanniang u la ong ba kim don jingsuba eiei namar ba ka iathuh ba ka jinging ding jong ka, ka dei na ka jingleh jong ka hi bad kam don jingkynnoh eiei ia la u lok bad kumta la pyntip sha ka Police Booth ban leh la la kamram kumjuh ruh ban iohi ba u kurim jong ka, u don beit bad ka haduh ba kin da shim rai ban mih noh na ka katei ka jaka sumar ha ka 01 tarik u Naiwieng, 2024.
Na ka liang ka Kong Delina Khongdup ka la ong ba kan sa ïakren bad ka Director General of Police ka Jylla halor kane ka jingjia bad yn pan kaiphod na u SP ka West Jaiñtia Hills District.
