Shillong, Naitung 23: Katba ka sorkar Assam ka dang pynkhreh ïa ka jingkyndang briew ha ki jaka kiba marjan bad ka Nagaland, ka sorkar Nagaland ka la dep ban pynmih ïa ka hukum ban “pynkhlain ïa ka jingpeitngor” pyrshah ïa ka jingthmu wan rung ki briew kiba shah beh na kitei ki jaka hynrei ka Sorkar Meghalaya kam shym la ïohi bad ap ynda don ba kyrsiew thiah.
Ha ka hukum jong ka 21 tarik u Naitung, 2025, ka sorkar Nagaland ka la kdew ïa ka “jingtieng” ba ki briew kiba shah kyndang bad shah beh shnong ha Assam kin pyrshang ban rung shapoh Nagaland, da kaba kdew ïa ki kum ki “nongwan buhai shnong be-aiñ.”
Na ka jingïohi ïa kane ka hukum na ka sorkar Nagaland, ha ka nohphai sngi jong ka 23 tarik Naitung, 2025, kawei na ki sengbhalang, ka Federation of Khasi, Jaintia & Garo People (FKJGP) ka la pynpaw ïa ka jingbynñiaw ia ka jingbym leh eiei ka sorkar Meghalaya wat hadien ka jingiohi ïa kiwei ki jylla ba kin pynmih da ki jingpynbna na ka jingkyn dang mynder ri kaba dang shen ha Assam.
Ha ka kyrwoh ba pyllait ha ka sngi Balang, u Vice President ka FKJGP Bah Kitboklang Nongphlang, u la pynpaw ba ki don ki district kiba don ha ka Jingma kum ka Ri-Bhoi, West Khasi Hills, East bad West Jaintia Hills lem bad ka thaiñ Ri-lum Garo bad ban pynrem ruh ia ka Sorkar Jylla halor ka jingbym lah ban pyntreikam bha ia ki ain kiba la don lypa, kum ka Inter-State Migrant Workmen (Regulation of Employment and Conditions of Service) Act, 1979, ka Meghalaya Residents Safety and Security Act (MRSSA) 2016, bad ka Meghalaya Identification, Registration (Safety & Security) of Migrant Workers Act 2020.
Haba kynthoh ïa ka sorkar, ka FKJGP ka ong, ba kane ka jingbym lah pyntreikam bha ia ki ain bala don lypa ka pyni ia ka jingbym don mon da ki bor synshar ban iada ia ki paid riewlum trai Jylla.
Kaba kyndit pat, ba tang hadien ka jingphah kyrwoh ka seng FKJGP, ka sorkar jylla ha ka por janmiet ka la pynmih ïa ka hukum kaba la soi da u Additional Chief Secretary, u Shakil P. Ahmmed uba khmih ia ka tnat Home (Political), ka la bthah ia ki Deputy Commissioner jong baroh ki distrik ba na ka jingkyndang ka Sorkar Assam ïa ki nongwan buhai shnong be-aiñ, ka lah ban don ka jingma kaba ki don ki briew ki ban pyrshang ban rung shapoh ka jylla kumta ka long kaba donkam na ka bynta ban “pynkhlaiñ ban tehlakam ia ka jingwan rung kyrthep kine ki briew bad ruh ka jingdonkam ban pynneh ïa ka shongsuk shongsaiñ”
