Da U Bah Wilster Anthony – Convener SOMALA
Ngi ju pyrkhat ba ka land transfer Act, 1971, kan iada ia ka jingleit noh ka Khyndew ka shyiap sha ki nongwei da ka jing pyntrei kam ia ki kyndon ain jong ka. Hynrei ka ba sngewsih ka long ba kam long kumta namar ki Sorkar kim shim pyntreikam ia ka ain Khyndew ka Land Transfer Act, 1971 kat kum ki kyndon ain jong ka.
U Bah Ardent Basaiamoit u la kylli ha ka Assembly ba la dep mynshuwa ba balei ka Sorkar kam shym pyntrei kam ia ki kyndon ain jong ka Land Transfer Act, 1971, da ka ba pynshitom ia kito kiba die bad thied jaka be-ain.
U Chief Minister, Conrad Sangma u la jubab ba dei ban ujor shuwa da ki riew paidbah shaphang ka jing iadie ia thied Khyndew be-ain. Ka ba mut ba ka Sorkar kam lah ban leh ei ei marwei hi khlem ka jing ujor shuwa da ki riew paidbah.
Hynrei ka jingshisha, ka jingkren jong U Chief Minister, ka mut ba kam lah ban ujor ia ka jing iadie ia thied jaka be-ain ha ing Kachari namar um don jingujor ei ei na u paidbah. Kumta ngi duh ei ia ka Khyndew ka shyiap ka ba la ioh be-ain da u nongwei namar ngim shym ioh lad ban pyntrei kam ia ka Land Transfer Act, 1971.
Imat lada ka long kumne, ka jingwan rah ia ka Land Transfer Act, 1971 ka long leh noh
ei. Hynrei kam long leh noh ei namar kine ki daw harum.
Ka Land Transfer Act, 1971, ka kren shai ha ka kyndon ain 3 (1) ba ka jingiadie ia thied khyndew ka dei ban long da ka jingmynjur jong ka Competent Authority bad khem ka jing mynjur ka Competent Authority ka jing iadie ia thied Khyndew ka long beain.
Katkum ka jingshisha la shem ba ka Sorkar kam shym la pynthymmai ia ka Competent Authority hynrei ka jingiadie ia thied Khyndew ka iaid beit sha khmat bad kumta ngi la shu duh ei ia ka Khyndew ka shyiap tang namar ba ngim don ia ka Competent Authority.
Ngi la thoh sha ka Sorkar ban pynthymmai ia ki dkhot jong ka Competent Authority man ki por hynrei kam pynsngew satia. Kumta ngim don Competent Authority bad kino kino ki jingiadie ia thied Khyndew ki long be-ain lupa wat lada ngim leit ujor sha ka ing Katchari. Ka Sorkar ka dei ban pyntrei kam ia kine ki jingshisha ban nym ithuh ia ki jing iadie ia thied Khyndew khlem ka jing mynjur ka Competent Authority kat kum ka kyndon ain 3 (1). Hato ki nongmih khmat jong ka Ri bad jaid bynriew ki ong aiu halor kane ka jing iadie iathied Khyndew be-ain khlem ka jingmynjur ka Competent Authority bad kin leh aiu nangne sha khmat.
Ka Section 6 ka mana ba ym bit ban register lane pynrung kyrteng ia ka kam iadie ia thied
Khyndew be-ain. Pynban ka Sorkar lyngba ki Registration Office ki ba don ha D.C Office bad SDO Office, ki register ne pynrung kyrteng naphang ia baroh ki jingiadie ia thied Khyndew be-ain hapdeng U trai ri bad u mynder ri, wat la ka long be-ain ruh.
Hadien ba la register ia ka Khyndew, wat la ka long be-ain kan long noh jong u nongwei. Te kumta ngi dei ban phikir bha shuwa ban register ia ka jingiadie ia thied Khyndew hapdeng u trai ri bad u mynder ri ioh ngi pynskhem bakla ia ka jing iadie ia thied be-ain, ka ban wan rah ia ka jingduh noh ia ka khyndew ka shyiap junom la junom. Kane ka jing register Khyndew da ka Sorkar khlem da peit bniah la ka long ka ba dei ne bym dei, ka iai jia man ka sngi man ka kynta, ka dei kaei kaei ka ba ki nong mih khmat kidei ban wad ia ka jingshisha ioh ngi shu kylla long ki refugee ha la ka jong ka ri ha ki pateng ki ban wan.
Nalor ki jaka ba la ai bad sanction da ka Sorkar sha ki Company dang don bun ki jaka ba ki
company ki bat bad pyndon kam. Ha kano ka kyndon ain ki leh ia kane? Hato ka kyndon ain kum ka Public hearing ka hap ha ka kyndon ain jong ka Land Transfer Act ne shabar jong ka. Lada ka long shabar ka Act, lehse ka long beain ban pynlong ia ka kum ka rynsan ban pynsngew ia ka jing ia die ia thied Khyndew.
Haba pule ia ka Amendment Act, 2010, ngi khmih lynti ba kane ka amendment kan pynkhlain shuh shuh ia ka Land Transfer, Act, hynrei ka nangpynsynjor, ka pharia lyngkhot lyngkhai ia ka ain Khyndew, ba ia ka bor ka ba don ei ha ka Land Transfer Act, 1971, la pyntlot bad punduh noh ia ka iktiar jong ka.
Ka jinghiar dor jong ka Land Transfer Act, 1971, ka paw tyngkrein khlem da kdew hangne namar ka la kren shai ha ka Amendment, Act, 2010. La I don kam ban amend (pynkylla) biang ia ka Amendment Act, 2010 ban pynim biang ia ka Land Transfer Act, 1971 kumba la thmu ia ka.
Ka la dei ka por ia ka jaidbynriew ban kyndit bynriew bad ia ki nongmih khmat kum ki MP, MLA, MDC bad ki synjuk Rangbah Shnong ban shim khia ban wan rah lane thaw ia ki committee ki ban pynkhat ia ka jingma kaba ap ia ka ri bad ka jaidbynriew ban wad ki lad ki lynti ban pynim ia ka. Lada ngi leh klet ngin jot noh thiaw.
