Shillong: Ka kyntien ban kynnoh ïa ki briew kiba leh don bor da kaba khot High Level kadei kaba la neh bha ha ka jingmut jingpyrkhat jong uwei pa uwei u nongshong shnong, kane ka mih hadien ka jingdonkti jong kita ki briew ha ki kam ar nombor kaba ki pynïaid ïa kiba bun ki kam ban kamai ioh nong shimet khlem ka jingsiew khajna bad ka jingdon bynta jong kine ki briew ha kine ki kam ka wanrah pat ïa ka jingeh na ka bynta kiwei pat kiba ïaid ha ka lynti kaba dei.
Sa shisien kum ka jingbteng halor ka jingwad jong u Shillong Mail ba ha kino ki bynta kine ki High Level ki don bynta, la lap ba ga ka thaiñ Pynursla kane ka jur bha bad ka la wan paw hadien ba ki nongniah trok kiba na ka shnong pynursla bad kiba dei kiba kamai jakpoh na ka kam shalan maw sha Ri Bangladesh ki la pynsngew halor ka jingeh kaba ki shem mynta la bun bun snem khamtam haba ïadei bad ka jingshah leh donbor ha kita ki high level kiba khang lad ïa ki ban ïoh ïa ka jingkamai.
Na ka liang ka kynhun u Shillong Mail ha ka 11 tarik u Naiwieng, 2024, ka la hiar sha pynursla ban ïakren bad ban sngap halor kaei kaba ki don ban pynsngew.
Ha ka jingïakren bad katto katne ngut ki nongniah trok, kaba na ka liang u Shillong Mail u la hap ban kah noh ïa ka dur khmat bad ban buhrieh ruh ïa ka kyrteng jong ki kumba ki la kyrpad na ka daw ba ki ong, ba ki bun ki runar kiba lah ban pynmynsaw ïa ki, haba batai ïa kaei kaba jia, ki la pynpaw ka jingbitar namar ka jingbymbiang ka rukom pyllait kali ka weight bridge kaba don ha Mawshun da kaba kynnoh ba ki kali jong ki high level kiba don kumba 50 tylli ei ei ki ïohlad ban ïaid katba mon katba ïa ki pat kiba la ap ïa la ka jong ka pali kim ïohlad satia da kaba pynpaw ba bunsien haba ki buh jingkylli, ki shah byrngem bad ban poi ruh shaduh u pud ban shah pynjulor ki kali.
Nalor kata, ki la pynpaw ruh ba ki kali jong kita ki high level ki ïoh ban kamai kumba 4-5 sien ha ka shi taïew katba ïa ki pat ka long kaba jynjar ban ïoh kamai tang 2 sien ruh.
