Shillong: U Bah Baitlang Pohsngap na Khimmusniang namar ka jingbym ïoh ticket na ka Voice of the People Party (VPP) ban ia aireng ha ka elekshon MDC na Jowai South MDC Constituency sha ka Iing Dorbar Thawain Jaiñtia Hills Autonomous District Council (JHADC) ha ha u snem ban wan, ha ka 12 tarik u Naiwieng, 2024, u la kynnoh ba ka State Election Committee jong ka Party ka khlem twad jingmut ba bniah na ki paidbah kaba pynlong ia u ban shah kyntait.
Da kaba pynpaw ba un iaid sha khmat ban ia aireng ha ka elekshon MDC ban wan kum u kyrtong khlem seng, u la ong ba u la pynïasoh sha ka VPP ha shwa ban don ka elekshon MP Lok Sabha mynta u snem.
U la ong ba u la khmih lynti bha ban ioh ia ka ticket na ka VPP bad bynrap pat ba ka jingduh ticket jong u na ka VPP kam dei pat ka jingkhanglad ba un iakhun ha ka elekshon MDC ban wan.
Da kaba pynpaw ba kane kan dei ka sien kaba ar ba un ïakhun ha ka elekshon MDC kata hadien u 2019 ha kaba u la ïakhun na ka seng Congress, u Bah Baitlang u la ong ba ka jingïakhun u ka dei ban iada ia ka jingwan rung kyrthep ki bar jylla, ban pynkhlain ia ka Khyrnit Ba Hynriew, ban pynbeit ia ka kam kajia pud, ban ïakhun ïa ka bamsap bad ban kyntiew ia ka ïoh ka kot.
