Shillong: Ka jingtrei shitom bad ka jingminot ka ju plié ka lad ïa ki ba bun haba ki don ïa ka thong bad kane ka la urlong ha uwei u khynnah uba dang 12 snem ka rta uba shong ba sah ha Jaïaw Laitdom bad uba dei u khun ka Kong Suzie Kharnarbi bad u Bah Torence Jones Lyngskor na ka jingleh jong u ban ïoh rah ia ka Takma Ksiar na ka lympung ïakob Asian Para-Arm-Wrestling Cup 2024 kaba hynñiew kaba la pynlong ha ka Mumbai.
Ka jingleit ïakhun jong une u khynnah uba la ithuh kyrteng kum u Graham Jones Kharnarbi ha ka Para-Arm-Wrestling dei na ka jingdon jingduna jong u ha ki kjat, ïa ka ba um lah ban ïaid bad ban hap pyndonkam da ka Wheel Chair.
Hakane ka jingiakob, kiba wan ia shim bynta kidei na kylleng ki Ri bad kadei kaba la long ha u bnai Risaw kata naduh ka 19 tarik haduh ka 27 tarik u Risaw, 2024.
Ha ka ba ïadei bad kane ka jingwanrah burom jong une u khynnah, ka la pynlong ïa u MLA ka North Shillong, u bah Adelbert Nongrum ha ka nohphai sngi 12 tarik u Naiwieng, 2024, ba un leit mih sha ka iingsah une u khynnah bad ban pynkup burom ha ryngkat ka song pisa kaba 30 hajar tyngka na ka skhim Intensive Sport Youth Development Programme (ISYDP) ia u samla Graham Jones Kharnarbi.
Haba ai jingkren u Bah Adelbert u la pynpaw ka jingsngew sarong ban ïohi ba ki samla ki la nang kiew shaphrang ha ka sap ka phong bad kum u MLA u la pynsngew ba un ïaleh ban nang kyntiew shuh ïa ka sap ka phong ki samla da ki lad ai jingïarap halor ki jingdonkam jong ki.
Na ka liang u Graham u la pyntip ba u la ïoh 5 tylli ki takma na ki lympung jingïakop bapher bapher hapoh ka jylla bad u la kyntu ruh ïa kiwei pat ki riew don sap ba kin ym sheptieng ban ïashim bynta ha kino kino ki lympung jingïalehkai.
Ha kawei ka liang, u kpa u Graham, u bah Terence u la batai lyngkot shaphang ka jingïaid lynti u khun bad ban ai khublei kyrpang ïa ka kynhun Meghalaya Armwrestling Welfare Association (MAWA) ha ka jingïalam ka kong Sumita Kshair ka ba dei ruh ka refree ha katei ka lympung.
