Shillong: Ka jingbym don ba patiaw ïa ka jingjot rathai jong ka surok National Highway-6 ha ka thaiñ Narpuh, East Jaiñtia Hills District ka ba la dap sa tang ki thliew ki syar hapdeng surok, ka la nang pynkulmar jingmut ïa ki paidbah bad ban kheiñ ba kidei ki paidbah ka jylla kiba la shah iehnoh khunswet.
Ha kane ka taïew, ka sur u paidbah ha ryngkat ki nongkitkam ka seng Hynniewtrep Integrated Territorial Organisation (HITO) kaba na Narpuh Circle ki la leit ban ïakynduh ïa ki riew paidbah kynthup ki nongniah kali ka ba ki la buh jingkylli, aïu kum ki riew paidbah ki don ban ong.
Kum ban shu pynkynmaw, ka HITO Narpuh ha ka 15 tarik u Risaw, 2024, ka la dep ban pynlong ïa ka jingïaid kjat ha katei ka surok naduh Lumshnong haduh Umkiang.
Ha ka ba ïadei bad kane, na ka liang ka HITO ka la pyllait paidbah ruh ïa ki jingthoh ki ba la Pynrem ïa ka Sorkar Jylla, ki MLA jong artylli ki konstitwensi na ka East Jaiñtia Hills kiba kynthup ïa ka kong Santa Mary Shylla bad u bah Kyrmen Shylla.
Ha ka jingïakren bad ki riew paidbah kiba dei kiba niah kali kiba kynthup ïa ki trai shnong bad ruh ki bar jylla, da ka bym banse hynrei ban shu hun ïa kaei kaba ka long wat haba ki hap ban ïaid na ki thliew bah kiba jylliew bad ka khohruh khohram, ki la ong, kum kane ka surok yn nym don bad ka dei kaba paka bha.
Ha kawei ka liang pat, ka seng HITO Narpuh Circle ka la pynrem ïa ka sorkar MDA, ka MLA katei ka konstitwensi ka kong Santa Mary Shylla ka ba khlem shimkhia ïa kane ka kam bad kumjuh ïa ka sorkar India.
