U Sepoy Aibok Madur uba la don kumba 34 snem ha ka rta udei u trai shnong na ka shnong Mawbri, Ri Bhoi Distrik bad u la kylla long kum u nongshong shnong ha ka shnong Lyngkhoi hadien ka jingpoi shongkha jong u. U Sepoy Madur u la khlad noh ha ka 7 tarik u Naiwieng, 2024 ha ka por ba u don ha ka kam ha Siachen Glacier.
U Sepoy Madur u la iehnoh ia ka tnga shadien haryngkat u khun shynrang ba dang shi snem tam ha ka rta.
Hashuwa ban rah leit on tep ïa u Madur ha u lum jingtep jong ka Balang Katholik, ha syndah jong ka synduk ka ba la tap da ka lama lai rong jong ka Ri India, la lah ban iohsngew bad iohi ia ka jingiam briew, ka jingjaw ummat.
Ha kajuh ka por la sakhi ba wat na ka ophis u Myntri Rangbah ka Jylla, u Conrad K. Sangma ka la phah ia ka jingsngewlem haryngkat u syntiew bad kiwei kiwei kumjuh ka jingleh burom kaba khatduh na ka Assam Regiment kaba ki ju leh da kaba shim Salute.
Ia ka jingleh niam la pyniaid da u Parish Priest, u Father Felix Lyngkhoi bad la ioh ia ka jingkren na u Father Pius Shadap uba la pyntngen ia ka iing ka sem bad ruh ban ong, ba u Sepoy Aibok Madur u la khlad don burom kum uwei u nongiada ia ka Ri.
Hashuwa kane, kata ha ka 10 tarik u Naiwieng, 2024, ka Sorkar Jylla lyngba u Myntri Rangbah, u Conrad K Sangma ula pynbna ba ka sorkar jylla kan ai T.20 lak sha ki bahaiing bahasem jong u Sepoy Aibok Madur u shipai uba len lade ïa la ka jingim ha Siachen.
U Myntri Rangbah ka jylla ula pynbna ia katei ha ka rynsan social media ka jong u ha ryngkat ka khubor sngewnguh ia ka jingshlur jong une u shipai uba aiti iala ka jingim haka jingshakri ha ka kam ban iada ia ka ri ha Siachen.
U Myntri Rangbah u la ong ruh ba ka jinglen lade ka jong u Madur kan long kaei kaei kaba yn ym lah ban klet kumta kum ka Jylla ka burom ia ka jingaiti ka jongu bad ka kynmaw ia ka jingaiti lut jong u na ka bynta ka ri.
