Shillong: Ka jingbym shah ieng ki taxi kamai ha ki bynta ka Motphran ban kyntiew bad pynhiar nongleit nongwan ka la pynlong ia ka Synjuk ki Nongñiah Taxi Sor bad Khap Sor ha ka 11 tarik u Naiwieng, 2024, ban pynpaw ia ka jingpyrshah bad ban dawa na ka tnat pulit ban pyntyllun ïa ka rukom pynïaid kumba ju long barabor kata ban shah ar tylli ki taxi kamai ban ieng ha kitei ki jaka.
Ka Synjuk ka la dawa ban weng ïa ka No Entry kaba don ha syndah katei ka jaka bad kum ban shu kdew ba ka jingpynkylla ïa ka rukom pyniaid ki kali kamai ka la sdang naduh ka 4 tarik u Naiwieng, 2024 ha ka sngi ba plie pyllait ïaid kali na Them Ïew Mawlong sha Bimola.
U Bah Pynsuk Youroi, General Secretary u la ong, ba ka jingbym shah shuh ban ieng kali ha katei ka jaka ka la ktah bha ïa ki nongniah taksi kamai bad kumjuh ïa ka leit ka wan ki paidbah.
