Shillong: Ka jingmih jingkynnoh na ka liang uwei u samla lyngba ka ejahar ha Madanriting Police Station ba u la shah rahbor bad shah shoh ha ka kynhun ba 20 ngut ki briew ba lam khmat da u Bah Henry Dkhar na Umphyrnai ha ka janmiet 03 tarik u Naiwieng, 2024 ka la pynlong ia ka Joint Action Committee ki saw dorbar shnong ba kynthup ia ka Umphyrnai, Kynton u Mon, Laitkor Mawrie Lumheh bad Lamlyer kiba iatyngkhuh pud ha Lad Smit, ban kyntait ia katei ka jingkynnoh bad pynshai ba kam dei kaba la leh da ka kynhun ba lam khmat u Bah Henry.
Kumta halor kine ki jingkynnoh, ha ka 11 tarik u Naiwieng, 2024, ki nongïalam shnong na kitei ki shnong kiba don ha ka Joint Action Committee ryngkat ka Village Defence Party (VDP) ki la lum ka jingïalang ha kaba ki la ong ba u tei u samla u dei u snar khaïi kyiad beaiñ uba la shah kem bunsien ha Lad Smit bad u don ka jingiadie kyiad beain ryngkat ka lok jong u kaba la shah kem teng ruh ha ki dkhot seng longkmie Umphyrnai kiba dei ki dkhot ki dkhot VDP.
Shuh shuh la ong kine ki shi kurim ki dei kiba snar bha ha ka kam die kyiad bad ki buh ia ki tiar synreit pynsat khmat lane ki Pepper Spray ban synreit ia kino kino khamtam ki dkhot VDP lada ki wan kem kyiad ia ki.
Kine ki nongïalam shnong ki la ong ba u Bah Henry Dkhar u dei u dkhot ka Joint Action Committee, u Rangbah Dong ka dong Dymmiew ha shnong Umphyrnai uba dei ruh u dkhot VDP Umphyrnai uba ia kit ia bah bha ia ki kam imlang sahlang khamtam ha ka ban rat dyngkhong ia ki kam sniew.
Ki la ong ba ha katei ka miet 03 tarik u Naiwieng, 2024, u Bah Henry Dkhar u la ïohi ia ki kali bad ki briew kiba ia thied kyiad na utei u samla bad kumta u la pyntip sha ki nongkitkam ba ha khmat ka VDP Umphyrnai bad sha ka Joint Action Committee kiba la wan ban tohkit ia utei u samla.
La ong ba une u samla u la pyneh bad kyllaiñ ktien da kumne kumtai bad kumta ki dkhot ka VDP bad JAC ki la ialam ia u sha iing shnong ha Umphyrnai ban tohkit bniah. Ki la ong ba une u samla u thok da kumne kumtai bad dei ynda ki dkhot VDP ki la pyndei dieng u sa phla bad ialam ia ki sha ka jaka buh kyiad jong u kaba don ha kawei ka iing ha ka bynta ba hap sha shnong Ur Masi u Joh ha Lad Smit.
Halor ka jingkynnoh, ki nongïalam ka JAC ki ka kubur ba ka la don ka jingpyndei dieng hynrei ym kaba jubor bad ym lah tip pat ioh don da kiwei ki ba bom ia u ynda la pyllait khnang ban kynnoh pat ia u Bah Henry bad kynhun jong u.
Shuh shuh na ka liang ki nongïalam ka JAC ki la ong ba kin sa ujor ejahar kylla ia utei u samla ynda ki la mir jingmut bad ki pulit namar u la shu pharep klumar bad imat don ba phah da mano re mano ia u ban kynnoh shimet ia u Bah Henry.
