Shillong, Risaw 20: Ka Hynñiewtrep Integrated Territorial Organisation (HITO) mynta ka sngi ka 20 tarik Risaw, 2025, ka la phah da ka jingthoh sha u Amit Shah, u myntri kam pohïing ka sorkar pdeng ba un tuklar lem na ka bynta ban wanrah biang ïa ka shongsuk shongsaiñ na ka bynta baroh ki jaidbynriew kiba sah ha khappud Assam-Meghalaya.
Ha ka shithi kaba la phah kum ka dorkhas lyngba ka ophis jong u Lat ka Jylla, u President ka HITO, u bah Donbok Dkhar u la ong, “Ki jingïakynad halor ka jaka kadei ka mat kaba la slem bha hapdeng ka jylla Meghalaya bad Assam kaba la neh naduh ba la seng ïa ka Meghalaya ha u snem 1971. Ha kine ki phew snem, kine ki jingïakynad ki la nang kiew sha ki jingïakynad kiba jur bha, kiba la wanrah ïa ka jingduhnong kaba khraw ïa ki jingim briew bad ka jingeh kaba khraw ha ka liang ka ioh ka kot na ka bynta ki nongshong shnong.”
Ha ka Dorkhas, u nongialam ka HITO u la ong, ba ki ar tylli ki sorkar, ka sorkar Assam bad Meghalaya ki kam ba ki don ha ka jingïakren kaba thmu ban pynbeit ïa kine ki jingeh kiba la slem bha, hynrei ia kine ki jingiakren, ka HITO shem ba ka long kum ka jingsop kaba shipor ia ka jingmynsaw kaba la jylliew bha, kaba ai ia ka jingkyrmen kaba thok sha ki jaidbynriew kiba sah ha khappud kiba mad ia ki jingeh ba man ka sngi, kynthup ia ka jingshah pynjot ia ki mar ki mata, ki jingduhnong ha ka kamai kajih, bad ka jingbymsuk ha ka imlang sahlang.
Ka HITO ka la kynnoh ruh b aka Assam ba ka dei kaba la pynkheiñ jur ïa ki jingïateh ba la buh ha ka thaiñ khlem da kheiñ snep ïa ki jingïateh kular, ki jingïateh kular, bad ki jingkular histori ba la ai, kaba ka la kdew halor ka jingshah thombor ha Langpih ha u snem 2009 ha kaba katto katne ngut ki mynsiem briew ki la duh bad ka jingshah thombor ha Mukroh ha u snem 2022 ha kaba ka la don ka jingïap briew.
Ha kane ka dorkhas, u bah Donbok u la pynkynmaw bad kaba dang shu dep jia shen kaba la paw pyrthei jong ka jingwan knieh jaka, ka sorkar Assam ha Lapangap, da kaba pyndonkam ïa ki jaitbynriew Karbi haduh ban khanglad ïa ki nongrep trai ri ka Meghalaya ban ioh ban lei tot ia u kba.
Nalorkata, u Bah Donbok u la ong ruh ki jingkular jong u Myntri Rangbah ka Assam, u Himanta Biswa Sarma, ban sangeh noh ïa kine ki kam pyntriem, ka paw ba ki jingkular ki long ki bym shisha”.
U Dkhar u la kynnoh shuh shuh ba ki kynhun lehnoh Karbi kiba kieng atiar ki don ha kitei ki jaka ban pyntieng bad pynshitom bein ia ki nongshong shnong bad ban bynrap da kaba ong, ba kane ka jingleh kam dei tang ba ka long kaba be-ain hynrei ka dei kaba pynjah burom ia ki nongrim riti synshar kiba synshar ia kane ka Ri. Kum kine ki kam kim dei ban sah khlem da tohkit, bad kiba donkti ki dei ban shah pynngat ha ka jingkitkhlieh halor ka jingleh bymsuidniew jong ki.
