Shillong, Risaw 20: Ka Hynniewtrep National Liberation Council (HNLC) ha ka kyrwoh jong ka 20 tarik Risaw, 2025, ka la phah ïa ka jingpyntip sha ka sorkar jylla ba lada ka kwah jingsuk kadei ban pynshisha da ka kam ym ban shu kren tang lyngba ki jingkren kiba long thylli.
Ha ka kyrwoh kaba la phah da General Secretary, u Bah Saiñkupar Nongtraw u la ong, lada ka sorkar jylla ka kwah jingsuk, kadei ban pynshisha da ki kam ym da ki jingkren ki bym don eiei. U la ong ruh, ba ki kob ïa ka sorkar ba kan pynbeit shuwa ïa ki jaka ha khappud hapdeng ka Assam bad kumjuh ruh kiba ïadei bad ka Bangladesh kaba la ktah jur ïa ki nongshong shnong mynta da ki phew snem bad katba ym pat lah pynbeit, ka jingïakren ïasuk kan nym don jingmyntoi.
Ka HNLC ka ong ruh ba ka pynbna ba ka Block I and II kidei ki jaka u menbarim bad kiba long aiñ jong ki paidbah ka Khasi-Jaintia. Ka United Khasi-Jaintia Hills Autonomous District, la thaw hapoh ka Sixth Schedule bad ka Historical survey map kaba la pynkhreh da ki British ha u snem 1872 bad sa ha u snem 1929 kaba la ithuh da ka sorkar Meghalaya ha kaba kam ïa ki jaka ha khappud ka pynshisha ba ka Block I and Block II ka hap hapoh ka bri Hynñiewtrep ym hapoh Karbi.
La ong ruh ba kine ki jaka kim don rekod ban pynshisha ba ki hap hapoh ki jaka Karbi bad ruh ba ki briew ba sah ha kitei ki jaka ki kren Khynriam bad Pnar bad ki riti dustur ruh kidei jong ka bri Hynniewtrep bad ka synshar khadar ruh katkum ki Hima jong ka bri Hynñiewtrep.
Ka HNLC nalorkata ka la ong ba ka Block I and Block II kadei ban don beit sha ka liang ka bri u Hynniewtrep. Kumta, ka la dawa na ka sorkar Meghalaya bad sorkar India ban nym pynkkyla ïa ki rekod kiba ladon lypa kata jong u snem 1872 vad 1929 katkum ki map.
