Shillong, Risaw 24: Ha ka jingdon jong ki briew kiba don ka mynsiem ban noh synniang ïa kiwei pat kiba duna ha ka ïoh ka kot, ka long ka jingkyrkhu na bynta kiba shem lanot, kiba mad jingeh ym tang ha ka bam ka dih hynrei wat ha ka ba ïadei bad ka jaka sah.
Kane ka dei ka khubor halor kawei ka longïing kaba la hap ban mad jingeh namar ka jingbymdon ïa ka jaka sah kaba bit ba biang.
Kane ka longïing ka dei jong ka kong Abaltis Thabah, kaba shong ba sah ha Mawlai Mawtawar, Laitlum, kaba don 4 ngut ki khun bad ar ngut pat ki dei ki khunswet kiba la ri hi da ma ka, hynrei na ka jingdon ïa ka mynsiem ïatiplem jong ka seng ki samla pule, kata ka North Eastern Hills University Students Union (NEHUSU), ki la pynshna da ka ïing ba paka na bynta kane ka longïing.
Ïa kane ka ïing la aiti noh sha kane ka longkmie ha ka 22 tarik Risaw, 2025, da u president rangbah ka Khasi Students Union (KSU) Central Executive Council, Samla Lambokstarwell Marngar, ha ryngkat ka jingïadonlang u samla Biangbor L. Paliar, President ka KSU Mawlai Circle, u Samla Sandy Sohtun, President NEHUSU, u Prof. RL Nongkhlaw, Dean students Welfare NEHU, u Prof. Lakhon Kma, President ka NEHUTA, u Rangbah Shnong, nalor kiwei kiwei pat.
Hadien ka jingdep ban aiti ïa ka ïing sha kane ka longkmie, na ka liang ka Union pynlong ïa ka jingïalang ba lyngkot ha Community Hall katei ka shnong ha kaba ka la aiti ruh da ki pla kot sha kane ka longïing.
Haba ai jingkren ha kane ka jingïalang, na ka liang u samla rangbah Lambokstarwell Marngar, u la ong ba ka sorkar kaba kren ban kyntiew ïa ki duk ki suk bad ban pynshna ïing na bynta kiba duna ha ka ioh ka kot hynrei ka ai sngewbha pynban sha ki katto katne ki heh saipan.
Nalor kata, u la ai khublei ruh ïa ka NEHUSU kaba la shim ïa kane ka sienjam ban leh ïa kane ka kam bad u kyntu ba kin nang ïai bteng ïa kane ka kam nangne sha khmat.
